ഡെറി : നോർത്തേണ്‍ അയർലണ്ടിലെ ഡെറി ഇടവകയിൽ പരിശുദ്ധ കന്യാമറിയത്തിന്റെ തിരുനാൾ ഭക്തി സാന്ദ്രമായി . ശനിയാഴ്ച ഇമ്മാക്കുലേറ്റ് കണ്‍സപ്ഷൻ ദേവാലയത്തിൽ നടന്ന തിരുനാൾ തിരു കർമ്മങ്ങളിൽ ഫാ ഫിലിപ്പ് പനമാക്കൽ , ഫാ ആന്റണി പെരുമായൻ , ഫാ ജോസ് കറുകയിൽ തുടങ്ങിയവർ കാർമ്മികരായി.
ഇടവക വികാരി ഫാ ജോസഫ് കറുകയിൽ കൊടിയേറ്റ് നിർവ്വഹിച്ചതോടെയാണ് തിരുനാൾ ആഘോഷങ്ങൾക്ക് തുടക്കമായത് . ആഘോഷപൂർവ്വമായ തിരുനാൾ കുർബ്ബാനയെ തുടർന്ന് പരിശുദ്ധ അമ്മയുടെ തിരു സ്വരൂപവും വഹിച്ചു കൊണ്ടുള്ള തിരുനാൾ പ്രദക്ഷിണം നടന്നു.
പ്രദക്ഷിണത്തെ തുടർന്ന് വിശുദ്ധ കുർബ്ബാനയുടെ ആശിർവാദവും സ്നേഹ വിരുന്നും നടന്നു. ഇതേ സമയം വിശ്വാസികൾ അടിമ വച്ചും , നേർച്ച കാഴ്ചകൾ അർപ്പിച്ചും പരിശുദ്ധ അമ്മയുടെ മധ്യസ്ഥം നേടി. ഇതേ തുടർന്ന് ഡെറി വിശ്വ മാതാ കമ്മ്യൂണിക്കേഷൻസിന്റെ ക്രിസ്തീയ ഗാനമേളയും നടന്നു. കൈക്കാരന്മാരായ ആന്റണി ഫിലിപ്പ് , ജോസഫ് അഗസ്ത്യൻ എന്നിവരുടെ നേതൃത്വത്തിൽ പാരിഷ് കൗണ്‍സിൽ അംഗങ്ങളും സണ്‍‌ഡേ സ്കൂൾ അദ്ധ്യാപകരും ഇടവക ജനവും സംയുക്തമായി തിരുനാൾ ആഘോഷങ്ങൾക്ക് നേതൃത്വം നല്കി .
തിരുനാൾ ആഘോഷങ്ങളിൽ പങ്കെടുക്കാൻ എത്തിയവർക്കും കമ്മിറ്റി അംഗങ്ങൾക്കും വികാരി ഫാ ജോസഫ് കറുകയിൽ നന്ദി രേഖപ്പെടുത്തി
